Thursday, October 18, 2007

قنا وناسها الطيبين

من زمان وأنا نفسى اسافر اروح كل حتة فى مصر لحد ما خلصت دراسة واشتغلت لقيت طبيعة شغلى بتتطلب السفر لكل المحافظات يعنى فى خلال التسع شهور اللى اشتغلتهم روحت تقريبا نص محافظات مصر يعنى روحت الشرقية واسكندرية ودمياط والفيوم وسوهاج وقنا واسوان واسماعيلية والسويس والبحيرة و كفر الشيخ اخر سفرية كانت لقنا واسوان قعدت فى قنا يومين وفى اسوان يومين ركبنا قطر تسعه بالليل على اساس نوصل قنا ع الصبح عشان نشتغل وكنت انا وزميل ليا فى الشغل المهم اتعرفنا على واحد فى القطر وقعدنا نتكلم مع بعض لغاية ما وصلنا قنا وكانت الساعه حوالى ستة المهم سلمنا على صاحبنا اللى كان ف القطر وخدنا موبيلات بعض وقالنا هتفطروا معايا النهرده قلناله ان شاء الله على اساس ان الكلام ده عندنا فى القاهرة عادى واحنا كده كده مش هنشوفه تانى المهم روحنا المكان بتاع الشغل لفينا الناس لسه مجتش فرحنا قعدنا ف جامع لقينا اتنين كانوا ماشيين وهيقفلوا الجامع بس لما لقيونا قعدوا عشانا لغاية الساعة تسعه وقعدوا يتكلموا معانا وواحد منهم كان من وجة بحرى قعد يتكلم ويمدح فى قنا واهلها والتانى كان تعليقه ان اهل قنا ناس (مختصرة) ملهاش فى اللف والدوران بعد كده ودعناهم ورحنا الشغل وحطينا حاجتنا فى الشقه اللى هنقعد فيها ورحنا عشان نشتغل وكان معانا واحد مسيحى رفض ان يشرب حتى سيجارة قدامنا وكل ما حد يعزم عليه يقوله رمضان كريم بعدها لقيت احمد صاحبنا بتاع القطر بيتصل بيا عشان نفطر مع بعض قعدت اتحججله بحجج كتير فقالى بص انا كده كده هعدى عليك ع الساعه اربعه وقفل السكة ولقيته بيخبط علينا الساعه اربعه وكان معاه واحد قريبه معاه عربية عشان ياخدنا بيها المهم لبسنا ونزلنا معاه وروحنا فطرنا مش عايز اقولكم كان عاملنا ايه ع الفطار قول كان مش عامل ايه فطار يكفى سبعتاشر واحد واصناف متتعدش وترحيب غير عادى بينا فى بيتهم وبعد ما كلنا وشربنا العصير وكلنا الحلو وشربنا الشاى مشينا عشان نصلى طبعا بالعافيه صلينا اربع ركعات قيام وروحنا نمنا وصحينا تانى يوم اشتغلنا وكان شغل اليوم التانى ده فى مراكز كل ما نروح مركز يمسكوا فينا عشان نفطر معاهم وبعد ما خلصنا شغل روحنا خدنا شنطنا من الشقة بتاعنا عشان نروح اسوان وركبنا حوالى الساعه اربعة العصر والمغرب اذن علينا فى الطريق وكنا لسه فى قنا فى قرية اسمها دنفيق لقينا ناس سادين الشارع ايه ياعم فى ايه .... انزلوا افطروا مينفعش تمشوا من غير ماتكلوا ونزلنا فعلاً وكلنا وشربنا وكملنا رحلتنا لاسوان الساحرة.

28 comments:

Anonymous said...

يعني الناس كرموكم على الاخر اهوه كل سنة وانت طيب الشعب المصري عامة معروف بالكرم

تحياتي

mohamed said...

شكرا يا شرين (ايامنا الحلوة) على زيارة مدونتى المتواضعة
وفعلا الشعب المصرى كله كرم بس بصراحة عشان مكونش كداب ماعدا بتوع دمياط

MKSARAT - SAYED SAAD said...

محمد مصر جميلة واكيد اهلها جمال جدا خلينا نسبت عامل مهم وهو ان كل مكان فيه الحلو والوحش بس انا مصري زيك وبحب البلد دية قوي مصر بكل محافظتها يا محمد جميلة وناسها انت سافرت اماكن كتير في مصر بس لو انت عايز تعرف قيمة مصر وناسها سافر اي دولة اجنبية هتعرف ان في مصر كمية دفى موجدة عند ناسها مش موجودة في العالم
معلشي انى اتأخرت على زيارتك لمدونتك لكن مش هتكون الاخيرة تحياتي اليك

mohamed said...

شكرا يا سيد(مكسرات) لزيارتك
وفعلا يا سيد محافظات مصر كلها حلوة وناسها طيبين وانا ليا صحاب دمايطة ومنايفة كمان وناس كويسة جدا
لان كل مكان بيبقى فيه الكويس والوحش

Doba said...

والله سبحان الله
شعب مصر ده طيب جدا

وقلبهم مليان بالطيبة والخير
ربنا يبارك فيننا كلنا يارب

اشكرك وتحياتى
هبة

shahy said...

حمد لله على سلامتك

وربنا يديم المحبة بين المصريين ويحنن قلوبهم على بعض

بس عاوزة اعرف شغل اية دة اللي بتلف فية كل دة؟

تحياتي

mohamed said...

doba
فعلا الشعب المصرى طيب قوى
وشكرا لزيارتك واتمنى انها تتكرر

shahy
شكرا لزيارتك لمدونتى واتمنى تكون عجبتك
وبالنسبه لانى شغال ايه انا شغال مهندس اجهزة طبية

shahy said...

كان الله في عونك يا مهندس الاجهزة الطبية وربنا يديك الصحة ويقدرك على المشاوير الكتييييييييير

تحياتي

ali said...

السيد الاستاذ /محمد مهندس الاجهزة الطبية
انا متشكر على زيارتك لمدونتى المتواضعة وعلى تعليقك الجميل معلش انا تعبتك بس فى الحقيقة انا مش كنت ناوى اكتب مدونة لانى حسيت ان محدش هيقرأها بس تعليقك الجميل حسسنى ان فيه حد ممكن يقرا عشان كده وعشان خاطرك بس كتبت شوية حاجات ابقى اقراها وقولى رأيك سواء بالسلب او الايجاب وشكرا مرة تانية
على حب

يا مراكبي said...

حمد الله عالسلامة أولا

ثانيا أنا بجد بجد معجب جدا بالبوست اللي قبل ده

ربنا يوفقك ويصلح لك الحال

mohamed said...

الله يسلمك يا باشمهندس مراكبى وانا بيبقى مبسوط جدا لما بتنورنى واتمنى ان موضوعاتى تعجبك

عصفور المدينة said...

جزاك الله خيرا
تاني بوست أقراه الأسبوع دهقبليه قريت اليعقوبي كاتب عن قنا وأنا مسافر قنا غدا مساء فهمت كدة إن المسافة 9 ساعات في القطر من القاهرة

سها السباعي said...

طول عمري كنت اتمنى اشتغل في مجال يستلزم السفر
باحب اركب القطر مووت
والسفر ده عندي اجمل حاجة
حضرتك هندسة طبية
زي اخويا
وبيتهيئلي الاخلاق دي انقرضت من القاهرة بس الحمد لله انها لسة موجودة في اماكن تانية
ربنا يوفقك

mohamed said...

عصفور المدينة

ان شاء الله هتستمتع فى قنا وربنا يجيبك بالسلامة والمسافة حوالى تسع ساعات لو قطر محافظات اما لو قطر مراكز ممكن ياخد 12 ساعة

سها

شكراً لزيارتك واتمنى ان مدونتى تكون عجبتك

Unknown said...

بتكلم بأسلوب سهل و بسيط و يا بختك بشغلنتك دى يا عم الى بتخليك تسافر على طول كده و تكتشف طبايع الناس دى حاجة جميلة أوى تلاقيك بتتثقف فى حاجات اكتر من أى كتاب

تحياتى و احترامى

mohamed said...

شكراً يا عاليا (عندليبيات) على مرورك
انا من زمان وانا نفسى الف مصر واديها لف وشغل مع بعض والواحد بيتعرف على ناس من كل حتة بدل ما كان بيسمع عليهم
وعلى رأى المثل اللى شاف ولا اللى سمع

منى said...

جميل قوى انك فى السفر تقابل ناس طيبين اكيد ده بيهون على الواحد كتير يا رب دايما يبقى الطيبين فى سكتك

mohamed said...

شكرا يا منى ( احاسيس ) على زيارتك
ويارب يوفقنا كلنا ويكرمنا بالصحبة الصالحة

Soooo said...

هو ممكن يكون تعليقي متأخر حبه .. حبه ايه .. ده متأخر قوي
ده احنا خلاص داخلين على رمضان السنه الجايه

المهم
عارف يا محمد لو عايز تقيس مصر فعلا .. روح الصعيد والارياف
هتلاقي هناك لسه في كل الخير بجد
وهتكتشف ان القاهره والاسكندريه والمحافظات الكبيره دي اتزنقت خلاص .. وطبيعي نتيجة حالة الزنقة دي انك تلاقي كل السلبيات من سرقه واستعباط ونهب ولا مبالاة .. الخ الخ الخ


في موضوع هبقى اكتبه ان شاء الله قريب عن زيارتي للصعيد سوهاج .. بلدي الاصلي

هو اي نعم انا كنت كتبته من زمان ونشرته في كزا منتدى .. بس بجد كلامك ده خلاني افكر اني انزله تاني

يلا ربنا يديم المعروف يارب

وبعدين خد هنا .. فين الجديد ياعم الحاج؟؟؟؟


سلامووووووووووووووز

mohamed said...

شكرا ياسو على زيارتك
انا على فكرة رحت سوهاج برده بس بصراحة الموقف اللى مش هنساة لسوهاج ان القطر كان المفروض ييجى سبعه لكن جه الساعة حداشر وطلع قطر مراكز
وانا مستنى اقرا ذكرياتك فى سوهاج

اما بالنسبة للجديد فانشاء الله قريب بس قول يارب

MKSARAT - SAYED SAAD said...

صديقي المختفي بقاله فترة
اية مفيش جديد
عايز اقرأ حاجة حلو عن بلدنا بس حلوة زيك .
تحياتى

mohamed said...

انا مش مختفى يا سيد ولا حاجه وان شاء الله هنزل بوست قريب ومشكرين قوى ع المجاملة الحلوة دى

Anonymous said...

محمد بما انى قناوى يا رئيس اب عن جد
بشكرك على رائيك فى اهل قنا بس ده مش طبع اهل قنا بس لو دورت حتلاقى طبع كل اهل مصر
ثانيا يا معلم ده ائيميلى barie2010@hotmail.com
حال كونك نزل قنا بلغنى او ضيفنى اديكى موبيلى واكون فى انتظارك تحياتى

mohamed said...

رئيس جمهورية نفسى
لا شكر على واجب ياباشا دى الحقيقة
وياعم انا لما اروح قنا هعدى عليك بس ميبقاش تقفل الموبيل عشان مغيرش رأيى(
هههههههههههههههههههههههه

Selfmeaning said...

اكيد كان يوم تحفة

انا برده كنت بحلم ان اكلم مع

كل الناس اللى فى مصر

ادينى اشتغلت فى 140

mohamed said...

Selfmeaning
المدونة نورت واتمنى متكونش الزيارة الاخيرة

Selfmeaning said...

ميرسى

و ميرسى لزيارتك ليا

منور دايما

Anonymous said...

احمد سعيد من دنفيق يرحب بك فى أى وقت ....
الكرم طبع مصرى وصعيدى ...
كل سنة وانت طيب ياعم .........