Thursday, December 14, 2006

ايامى مع الجيش

النهرده هكتبلكم على الاحداث اللى مرت بيا وانا بعمل الورق بتاع الجيش ونبدا بمعاد تسليم ورقى فى الجيش ربنا يبعده عننا كلنا وطبعا كانوا طالبين شوية مطالب مع انهم بيقولوا انى فى حكومه الكترونيه يعنى بدل متتنيل تعمل كل ورقه فى حته المفروض هما يكون عنهم علم بيها المهم يا سيدى رحت عشان اقدم ومع انى رايح الساعه 9 وده بدرى بالنسبالى قوى لكن عينك ماتشوف الا النور طابور من هنا لغاية عينك متجيب ....يا حلاوة احنا كده مش هنسلم النهرده المهم احنا كنا شوية اصحاب مع بعض فقلنا واحد يقف والباقيين يجيبوا اكل يصوروا الورق اللى متصورش فالنهم انا رحت اجيب اكل انا وواحد طبعا التقديم بتاعنا فى حته مقطوعه علبال ملقينا اكل ورجعنا كانت الساعه عدت 11 المهم جاى اقف مع صاحبى اللى انا سايبع واحد قاللى مينفعش يا كابتن قلتله هو ايه يابنى قاللى انت فاكرنى مختوم قلتله وايه اللى ختمك قاللى روح اقف فى اخر الطابور قلتله دا مكانى انا حاجزه من الصبح قاللى بص انا حمار وجيت لقيت القفا دا قدامى (بيتكلم على قفا صاحبى ) قلتله يعنى انت اهم حاجه عندك القفا قاللى اه قلتله خلاص خليك فى القفا اللى قدامك وانا اقف قدام صاحبى قاللى وانا ماللى كده هو اللى هيبقى مختوم(صاحبى) المهم حبيت اخلص الموضوع وقلتله كل سنه وانت طيب قاللى طيب وكانى بشحت منه مع انه ولا بلاش الطيب احسنالمهم يا حمادة العساكر لما لقيوا الناس كتير قالوا العاده يمشوا وييجوا بكره و(والعاده لمن لا يعرف هم الناس اللى معهمش مؤهلات ) طبعا كان موقف رخم لما واحد فى بدايه الطابور ويروح لمجرد انه عاده طبعا قعدوا يتحايلوا على الظابط اللى بدوره خرج عليهم يالعصايه لتفريق المتظاهرين من الناس العادة وبعدها رحت اتمشى شويه وجيت ببص من بعيد ملقيتش الطابور لما قربت لقيت انهم لما زهقوا قاللوا للواقفين لموا ورقكم كلكم مع بعض وروحوا وتعالوا يوم1/11اول ماجيت واحد قاللى انت كنت فين عمالين نرنلك ومفيش شبكه (ما احنا فى حته مقطوعه ) المهم قاللى يلا بسرعه طلع الورق بتاعك اشوفهولك كامل ولا لأ والمهم طلع كامل الحمد للهالمهم ادينالهم الورق وكنت اخر واحد سلم ورقه واللى جه بعدى قاله تعالى بكره يا حمادهبعد كده مشينا ويال الفاجعه الواد اللى معانا اللى شغال دليل للبنى ادمين يقولهم ايه اللى ناقص واللى زايد واحنا فى العربيه لقى معاه ورق فى ايده بيبص فيه لقيه شهادة المؤهل ههههههههههههههههههههههههههههههه يانهار ابيض نسيت اسلمه مع الورق ورجع تانى ياعينى ولسه مجتليش اخبار هو عرف يحط شهادات التخرج مع الورق بتاعه ودفع كام للعسكرى اللى هيحطهمله فى وسط ورقه ولا الناس طلعت شريفه ومريضيتش تاخد فلوس او طلعوا رخمين ومخدوش الورقالمهم ياحماده ياحبيبى صحينا بدرى فى اليوم ده ورحنا على الحته المقطوعه اول ما رحنا بقول العسكرى احنا المفروض نستلم ورقنا النهرده قالنا لا تعالوا بكره قلتله دا هما قالولنا على النهرده قالى انا اللى قلتلك 1/11 وانا اللى دالوقتى بقولك 2/11 عندك اعتراض لا ياعم الطيب احسن المهم سيبناه وقلنا ندخل البلد دى نشوفلنا اى حاجه ناكلها المهم رحنا مطعم كنا رحناه المره اللى فاتت والغريبه ان المطعم ده كان بيبيع السندوتشات بربع جنيه المهم احنا فى المره اللى فاتت ابدينا اندهاشنا من السعر ده فقرر انه بعد كده يعاملنا سياحى يعنى السندوتش بنص جنيه وده الظاهر كتير قوى عندهم المهم يا حماده خدنا الاكل ورحنا قعدنا على قهوه عشان اللى عايز يشرب شاى واللى يشد حجرين معسل المهم قعدنا وقلناله عايزين ميه نشرب طبعا احنا متوقعين يجيبلنا قزازه ميه معدنيه او حتى كبايات ميه نضيفه لكن هو خيب املنا وجابلنا قزازه من بتاع السفن اب بتاع القرن الخمستاشر ومعفنه وحالتها بالبلا وطبعا الدكتور اللى كان معانا قلنا متشربوش وقعد يقولنا مخاطر الميه المعفنه المهم حطناها على جنب وطلبنا الطلبات بتاعتنا وشربناها ومشينا عشان نروح ونيجى بكره طبعا كان كتير عليا انى اروح كده كل يوم فقررت انى مروحش اليوم اللى بعده وبالفعل مروحتش واصحابى اتصلوا بيا قالولى قالولنا تعالوا بكره وبعدها بعدة ايامخدنا الورق وقالولنا تروحوا تكشفوا يوم 7/11وياله من يوم انا رحت الساعه8 الصبح رجعت العشا مع انى خلصت كشف الساعه 10 بس مشكلتى انى معنديش واسطه لانى اللى عندهم واسطه روحوا علطول فى اليوم ده شوفت حاجات غريبه يعنى بعد ما قلعنا هدومنا عشان يكشفوا علينا كان جنبى واحد عايز يعمل اى حاجه عشان ياخد اعفا وكل ما يقولهم على حاجه تطلع فشنكوفى نهايه اليوم خدنا ورقه اسمها 110 وقالولنا تعالوا يوم 29/11وكنت انا مترشح عسكرى يعنى سنه واحده وبقيه الناس كانوا مترشحين ظباط 3 سنين وطبعا النق كان شغال على اخره من اصحابى ومن الناس اللى كانوا فى الاتوبيس لما عرفوا انى مترشح عسكرى ومن طوب الارض لغايه قبل اليوم اللى هنعرف فيه اان كنا هنلبس ولا لأ وصدر قرار غريب بتحويلنا من عساكر لظباط يعنى تلات سنين يا معلمالمهم جه يوم الارجاء وهو لمن لايعرف اليوم اللى بتعرف فيه ان كنت هتتنيل تلبس ولا تاخد البراءه وكان يوم عصيب جدا لانى تخيل انى تاريخ ميلادك بيتحكم فيك يعنى تخيلوا من كام شهر واحد صاحبى قدم فى الجيش وكان مواليد 28/6 وهما خدوا فى الجيش من اول 13/6 لغايه 28/6 يعنى تخيل لو ابوه صبر للصبح وكان سجله فى اليوم اللى بعده مكنش دخل الجيش لكن تعمل ايه اقدار المهم قعدنا فى اليوم ده بين الحياه والموت لغايه مقرروا انهم يعفوا عننا الحمد لله ماعدا واحد صاحبى اتخطف من جنبنا والسبب تاريخ ميلاده
لعن الله الحظ

Sunday, November 19, 2006

فوائد الحرامى

ياه المغرب باقى عليه ساعتين والمواصلات زحمه ومعايا شيله ميشلهاش عشره اعمل ايه
بص انا احسن حاجه اركب الاتوبيس هيوصلنى لغايه البيت هو صحيح هيبقى زحمه بس بدل متنطط فى الميكروباصات بالشيله المهببه اللى معايا المهم ياعم رحت الموقف بتاع الاتوبيسات ولقيت الناس مستنيه الاتوبيس اللى انا هركبه بقالهم اكتر من ساعتين وطبعا ناظر المحطه ولا هو هنا المهم بعد حوالى ساعه وصل الاتوبيس المنتظر وفى لمح البصر الاتوبيس اتملا طلعت ملقتش مكان يلا مش مهم هى اول مره تقف
المهم السواق قال هستريح دقيقتين قلتله براحتك ياعم انت بتتكلم فى ايه وواحد تانى قاله ازاى احنا متأخرين يلا امشى طبعا السواق بصله بصه مش ولا بد ونزل من الاتوبيس شويه وطلع وهو فى نيته يرخم ع الراجل اللى كلمه بطريقه وحشه المهم ياعم انا قعدت ع الحاجه بتاعتى جنب السواق وهو كان مستريحلى قوى معرفش ليه يمكن عشان شكلى ابن ناس المهم اول ماالسواق قعد ع الكرسى قال للراجل اوعى كده عشان المرايه
قاله انت بتعاملنى كده ليه هى دى مش شغلتك طبعا السواق دمه فار وقاله انت هتشغلنى بكيف اهلك انا اعمل اللى انا عايزه وكان هينزل(الهاء عايده ع السواق مش الراحل التانى) من الاتوبيس ويسيب الاتوبيس واحنا فوق الكوبرى لكن الحمد لله رجع فى كلامه المهم ياعم واحد ابن حلال قاعد ورا حب يهدى الموضوع قاله نهارك ابيض يا اسطى وفى رد غير متوقع السواق رد عليه وقاله ابيض ولا ازرق انت مال امك شويه واحنا ماشيين راح مفرمل راح الراجل المغضوب عليه دخل لقدام طبقا لنظريات الفيزيا طبعا السواق هاج عليه وقاله انا مش قايل لامك اوعى عشان المرايه
شويه وبدا يحكيلى انه شغال فى المهنه بقاله عشرين سنه ويعرف اللى طالع من منظره يعرف ان ده ابن ناس وده حرامى انا رديت عليه وقلتله يبقى عارف ان اللى طالع ده حرامى وتسيبه قالى دول لهم فوايد كتير بص ياسيدى الحرامى من مصلحته ان الاتوبيس يتملى عشان يعرف يسرق فتلاقيه يقول ادخل يا استاذ العربيه فاضيه قدام ويقف ع الباب وينادى لغايه ما يكبس العربيه وطبعا دى فايده ليا لانى باخد 2% من كل تذكره وتانى حاجه ان الحراميه بيبقى عارفين انى عارفهم وبعدين هما ناس ذوق تلاقيه وهو نازل بعد ما يظبط نفسه بكام محفظه ولا موبايل يميل ع الكمسرى ويديله علبه ملبورو فيها قد عشره ولا عشرين جنيه ويقوله دا الشاى بتاعك انت والسواق قلتله بس كده حرام قالى ياعم منا لو معملتش كده ممكن الحرامى يلاقينى فى اشاره واقف وينادى يقولى يا اسطى رايح رمسيس واول ما ابصله من الشباك تلاقيه رش عليا ميه نار وانا عندى عيال وعايز اربيهم

Saturday, October 28, 2006

الحياة احداث

حاجات كتير بتحصل للواحد ومع الواحد وبيبقى نفسه يحكيها للناس ويدونها عشان مينسهاش بعد كده سواء كانت احداث سوده ومنيله بنيله او حلوه وزى القمر عشان كده انا فكرت اكون واحد من المدونين