Friday, November 02, 2007

ماما سوزان

منذ حوالى سنتين فى رمضان كنت رايح 6 اكتوبر وشاورت لعربية يابانى وقلتلها اكتوبر قالى اركب فركبت ومشينا والراجل مشى من طريق غريب ولما اخويا اللى كان معايا بيقولى الطريق ده غلط قلتله يمكن طريق مختصر لغاية ما واحنا ماشيين الكاوتش بتاع العربية فرقع فنزلنا فى الصحرا وقعدنا نلعب سيجا ونكتب ذكرياتنا فى الصحرا لغاية ما السواق يركب الإستبن فواحد عجوز قالنا انتوا رايحين فين فى الفيوم قلناله لا دا احنا رايحين اكتوبر انت راكب غلط ولا ايه يا عم الحج الراجل ضحك وقال دا العربيه رايحه الفيوم ياحلاوة ورحنا اتاكدنا من واحد تانى لقيناها رايحة الفيوم فعلاً وطبعا مسكوا فينا عشان نفطر معاهم بالذات الراجل العجوز لكن احنا شكرناهم ورحنا الناحيه التانيه ووقفنا فى الصحرا اكتر من نص ساعه لبعد المغرب ومحدش وقفلنا لغاية ما جت عربيه نص نقل محمله خضار على اخرها ووقفت على بعد متين متر فجرينا عليها وقلنا اى حاجه احنا هنتنك دا احنا فى صحرا وجرينا لغاية ماوصلنا للعربية ولقينا السواق بيدينا كيس بلح وبعدها مشى ونحن مذهولين بس قلنا مش مهم اهى حاجه نفطر عليها لغاية ما ربنا يرزقنا بعربيه ولكن يبدو ان الرجل اعاد حساباته ووقف مرة تانى على مسافة بعيده فجرينا عليه تانى ولحسن حظنا قالنا اركبوا وفعلاً ركبت انا جنب السواق لانى كان عندى برد واخواتى اشعبطوا ورا لحد ما وصلنا اكتوبر وطبعا اخواتى كان جالهم برد عشان محدش يبقى احسن من حد ومن ساعتها وأنا نفسى اروح الفيوم لغايه ما من شهرين وبحكم شغلى كنت رايح مستشفى فى الفيوم وكان فى اليوم ده احمد نظيف رايح يفتتح مدينة جديدة فى الفيوم لقينا طبعا الشوارع مرشوشه ميه اللى الناس مش لاقيه تشربها م الرماية لغاية الفيوم وورد ويفط بالهبل يمكن تكلفة الورد واليفط والناس اللى كنست والناس اللى رشت اكبر من تكلفة المدينة ذات نفسها وطبعا وصلنا ييجى فى تلات ساعات عشان كل شويه تفتيش وبعد ما وصلنا ورحنا المستشفى فبقول للدكتور ع اللى حصل قاللى دا النهرده ولا حاجه عارف انا اسوا يوم فى حياتى يوم ما سوزان جت الفيوم كان قدامها 3 ساعات عشان توصل وفيه واحده هتولد وعايزه تروح المستشفى مرضيوش يدخلوها فقعدنا نتحايل ع الضابط ونقله دى سوزان قدامها 3 ساعات ودى وليه غلبانه وهتموت لو ما راحتش المستشفى قالنا تموت مش مهم المهم الست تيجى تلاقى الدنيا متظبطه وماتت قدامى وانا مش عارف اعملها حاجه ....................تحيا مصر

32 comments:

عصفور المدينة said...

بأي ذنب قتلت
حسبنا الله ونعم الوكيل أنا تفاءلت وأنت تحكي عن مراجعة السائق لنفسه

ولكن الشر أعم من ضمير هذا السائق حسبنا الله ونعم الوكيل

mohamed said...

شكرا يا باشمهندس عصفور المدينة على زيارتك اللى بجد بكون سعيد بيها جدا
ومقدرش اقول غير حسبنا الله ونعم الوكيل

منى said...

معقوله ده حصل ان مش بكدبش بس مش قادره اصدق ان حد يعمل كده مع انسانه بتموت قدامه وهما يعنى لا فى المعتقل ولا بينهم وبينها حاجه
حسبنا الله ونعم الوكيل

MKSARAT SAYED SAAD said...

اشهد ان لا اله الا الله وان محمد رسول الله

mohamed said...

منى (احاسيس)
الف شكر على زيارتك وطبيعى انك متصدقيش اللى حصل لانك انتى احاسيس ودى ناس معندهاش ريحة الاحساس

سيد(مكسرات)
ايه ياعم بتشاهد على روحك ولا ايه
ههههههههههههه

ابوزياد الفاتح said...

عظيمه يا مصر
يا ارض الفتن
يامهد القذاره
يا ام المحن
نيلك منتن
شعبك مكسل
جوك مطين

اقول ايه بس
اسكت يا اخى
دا انا منفووووووخ منهم

تائهة فى أرض الأحلام said...

مهما تقول عنها أ:يد كانت مغامرة ممتعة جدا

أهنئك عليها

أيامنا الحلوة said...

حسبنا الله ونعم الوكيل انا مجربة الموضوع بتاع زيارة سوزان مرة قعدت في الطريق عشان اوصل لمدينة نصر حوالي ست ساعات لحد ما كنت بعيط منهم لله بجد والله يرحمها الست اللي ماتت دي حسبنا الله ونعم الوكيل

تحياتي

osama said...

لو ان بقرة تعثرت في العراق اخاف ان يسألني الله عنها لم لم تفسح لها الطريق يا عمر...

بقرة مش انسان كرمه الله ...

فكأنما قتل الناس جميعا
هنا قتلو الناس جميعا
ماتت بجد ماتت ... لا اله الا الله
لنا الله الذي يمهل ولا يهمل

وها انت ذهبت للفيوم يا صديقي ... لكنك لن تنسى ابدا تلك الزيارة التي ليتها لم تكن

دمت بكل ود
خالص تحياتي

mohamed said...

ابو زياد الفاتح
منور المدونة بس يابوزياد
بس مصر مش وحشة كده بس تعمل ايه

تائهة فى ارض الاحلام
نورتى المدونة

شرين(ايامنا الحلوة)
اهم حاجه انها تلاقى الدنيا زى الفل وليذهب بقية الشعب الى الجحيم مش كفاية انهم عايشين

اسامة
نورت يا اسامه المدونة
بس المقارنة مع سيدنا عمر بعيده قوى المفروض نقارن بالحجاج وهتطلع طبعا لصالح الحجاج

بندقه said...

بجد افتكرتك بتحكى حكايه ظريفه وتوهان فى الصحراء وشعلقه فى عربيه الخضار

وبعد كده حال مصر
واهو برضه هم يضحك وهم يبكى

بس حسبى الله ونعم الوكيل ى اى واحد لا يراعى ربنا فى تصرفاته

ذنبها ايه الست الغبانه دى وولادها وعيلتها
تموت عشان ظابط غبى بينفذ اوامر عليا بطريقه عمياء

زى مابقول دايما
لكى الله يامصر والمصريين

MKSARAT SAYED SAAD said...

محمد ازيك
بقلك ليا طلب عندك بجد عايزك تكتب عن مصر حاجة جديدة تكون حقيقية وجامدة
اكتب حاجة تقول للدنيا ان مصر بخير لسا
بصراحة نفسي اسمع واشوف واقرأ حاجة حلوة عن مصر ... ممكن
تحياتي

mohamed said...

بندقة
اهلاً بكى فى الحلوة دى بلدنا
وكويس انى مستطردش اكتر من كده فى المغامرة بتاع
الصحرا وعربية الخضار كان جتلك فيها صدمة

مكسرات
ايه ياعم سيد منا كاتب البوست اللى قبلة عن قنا
وكانت حاجة حلوة
بس متزعلش ياعم ان شاء الله قريب بس قول يا رب

MKSARAT SAYED SAAD said...

يا رب

متغيرة شوية said...

مش متصورة السفالة توصل للدرجة دي بجد

يعني هما متصورين انها شايلة أسلحة الدمار الشامل في بطنها علشان تغتال الست سوزي

الله يحرقهم

Rosa said...

تحيا مصر
ام الدنيا

أميرة ويلز said...

مش ممكن

حسبنا الله ونعم الوكيل كل دة عشان زيارة الست هانم اعوذ بالله

على فكرة انا عشت فى الفيوم حوالى 6 شهور

حسيت فيهم انها بلد غير ك مصر بناسها ورتم الحياة فيها
بجد بلد جميلة جدا

متشكرة اوى على زيارتك لمدونتى وياريت اشوفك تانى

سلامى

mohamed said...

سلمى (متغيرة شوية)
شكرا يا سلمى على زيارتك
و يا سلمى اهم حاجة سوزى الست اللى ماتت منها كتير لكن احنا عندنا كام سوزى

روزا
اه صحيح انا عايز اعرف هو احنا بس اللى بنقول مصر ام الدنيا ولا كل الدول عارفة كده

أميرة ويلز
شكرا يا اميرة القلوب على زيارتك واتمنى تكون مدونتى عجبتك

يوميات عيل مصري said...

محمد أول مرة أزورك
شكرا على الزيارة عندي
مدونتك وفكرتها تحفة
على فكرة في موضوعين عندي يخصوك اوي
فل وياسمين
إيدي النور يا بهية

لو قرأتهم قوللي
خالص تحياتي ليك ولمدونتك الهايلة

يوميات عيل مصري said...

عمنا اللي بيحب البلد الحلوة دي
ما تيجي تحضرنا في مجلس خناقة يمكن تعمل الواجب وتصالحنا

مهندس مصري said...

لا حول و لا قوة إلا بالله و حسبنا الله و نعم الوكيل في الظلمة المفتريين

أول مرة أجيلك و مش الأخيرة ان شاء الله

mohamed said...

مهندس مصرى
سعيد بتشريفك ليا واتمنى ان بوستاتى تعجبك

Anonymous said...

تحيا مصر وتحيا السبع تلاف سنه حضاره وتحيا الحريه وتحيا عيله الرئيس
وحسبى الله ونعمه الوكيل

Selfmeaning said...

ما احنا قلنا قبل كده

الانسان فى الدنيا ديه

رخيص

mohamed said...

Selfmeaning
المصرى مش رخيص ده ببلاش وعلية سبعين مليون مواطن فوق البيعة

mesh2dra said...

السلام عليكم

ماتت!!!
الدنيا لازم تكون متظبطة
انتوا عاوزين تمشوا عكس قوانينها
يابنى دي ناس ماشية بالكتاب
يشوفوا الكتاب بيقول ايه
بيقول في صفحة كذا ان لو فيه مرور او زيارة طز في البشر المهم اللي بيعدي

وبعدين حتروح بعيد ليه
اقربها الكام طالب اللي ضاع عليهم الامتحان
لان الرئيس كان معدي في المنوفية
وطبعا انسى ان الامتحان يتعاد مرة تانية


لا بجد
مدونة هادفة
احييك عليها

بوستاتك كلها في الصميم

سلاماتي

Selfmeaning said...

معاك حق

الواحد بقى مجانا

و عليه فلوس كمان

احمدك يارب

خمسة فضفضة said...

السلام عليكم ورحمة الله وبركاته

منهم لله هايروحوا من ربنا فين
حسبنا الله ونعم الوكيل

لماضة said...

نقول ايه بس
حسبى الله ونعم الوكيل
ربنا يرحمها ويقدرنا
كل سنه وحضرتك طيب يا هندسه وسعديه بزيارة حضرتك اللى خلتنى اعرف بيها مدونتك
هروح اخد لفه فى المدونه بقى

mohamed said...

خمسة فضفضة
شكرا يا دكتورة ع الزيارة واتمنى متكونش الاخيرة
وحسبنا الله ونعم الوكيل فيهم


لماضة
نورتى المدونة يا دكتورة
وكل سنة والامة العربية والاسلامية بخير

عاليا حليم said...

و الله التعليق مالوش لازمة حعلق اقول أيه بس حبيت أوضحلك انى أتأثرت للحال المقزز ده ... و تحيا مصر

mesh2dra said...

السلام عليكم

فينك
مفيش جديد ليه

يارب تكون بخير

سلاماتي