Thursday, July 12, 2007

فتح مخك حالك يمشى

لو سمحت عايز البطاقة بتاعى
انت عملتها امته
بقالى اسبوع
طب عدى كمان يومين
انا كل مرة اجى فيها تقولى تعالى كمان يومين
يلا يابنى من هنا
يمد صاحبنا يده فى جيبه ويخرج خمسة جنيهات ويضعها فى الدرج المفتوح ثم يقول
بس شوفها بس يمكن تكون تايهه هنا ولا هناك
طب شوف كده فى الرف اللى هناك ده
اه لقيتها مشكرين ياعم مرسى
موقف بيحصل كتير جدا وعادى واهى ماشية ونيجى نقول دى الحكومة فسدة ومرتشين وحرامية طب م اللى بيحصل فينا ده نتيجة انى فينا كتير زيهم بس مجاتلوش فرصة انه يبقى مرتشى كبير فبيشتغل على قده وتلاقى الناس دى زى الحرامية الكبار يقعد يتكلم عن الشرف والامانة وانه عمره مايدخل بيته قرش حرام لدرجة انك تحسبه تقى وورع يعنى فى مره لقيت واحده بتتكلم وصوتها عالى وكانت بتتكلم ع الرشاوى فقلتلها طيب اتكلمى بالراحة قالتلى يابنى أنا إيديا نضيفة واللى إيده نضيفه ميخافش بصراحه قلت ياريت كل الناس زيك كده وفيما بعد اكتشفت انى الست دى أكتر واحدة بتاخد رشاوى واللى كان مضايقها ساعتها إنى فى حوار مخدتش فيه
تعالوا نعمل حملة مع بعض لمكافحة الرشاوى كل واحد بالطريقه اللى هو شايفها

6 comments:

mariam said...

ده بيحصل كتيييييييير جدا
لكن المشكله اننا مش بنعتبر ده رشوه

بل اصبح فى ثقافتنا عاادى جدا
و مفيش مشكله

تحياتى

mohamed said...

فعلا يا دكتورة دى بقت المشكلة الحقيقية إنى الموضوع بقى عادى وبسيط بالنسبالنا ومبقناش نحس انها رشوة لغاية ما كل حاجة بقت ماشية بالرشاوى

يا مراكبي said...

موضوع جميل .. لكن الظاهرة دي تخطت حاجز إنها ظاهرة وبقت من أساسيات الحياة في بلادنا دلوقت .. والموضوع محتاج علاج بيبدأ من معرفة أسبابه الأول علشان نعالج جذر المشكلة مش أطرافها

شوف بقى تجربتي أنا كمان هنا

http://yamarakby.blogspot.com/2006/11/blog-post.html#links

الشهيد الحي said...

عندك حق بيحصل كتير

انا حبيت ابلغك شكر اخي احمد الجيزاوي علي سؤالك عليه

وارجوا ان تعجبك مدونتنا

أجزاخانجيه said...

طيب هتمشى ورقك ازاى
والرخصه
والبطاقه
هيا اصلاً
مصر = واسطه + رشاوى
الموظفين دول اصلاً من اكتر فئات الشعب استفزازاً
بداً من سندوتشات الفول والبيض اللى بياكلوها فى الشغل
والجرايد و الشاى
والغباء
والتناحه
وقلة الادب
والبرود
.......
اول عهدى فى الاصطدام بالموظفين
كنت لسه تامه ستاشر سنه
وروحت انا وصحابى نطلع البطاقه
وطبعاً لسه صغيرين - لسه بنقول يا طنط مش يا مدام - ومش فاهميين اى بطيخ
وهو الورق خلصان و كل حاجه
والست بتقولنا روحو ادارة ايه وهتولى ورق ايه
لسه فاكره منظرها لحد دلوقتى
تخييييينه ولبسالك غوايش دهب نص ايديها وكل ما تتحرك تعمل صوت مستفز
وبعدين رجعنلها تانى بنقولها يا طنط الناس قالولنا البطاقه مش محتاجه الورق ده
راحت ضحكة ضحكه للجنبها كدا وبتقولها -مش فاهميين
قالتلها خلاص خلصيهلهم
مفهمتش بقى غير بعدها بسنه
ايه اللى كانت تقصده من مش فاهميين
طنط واطيه صحيح
.........

mohamed said...

شكرا لزيارتك يا دكتورة (اجزخانية)
انا لما جيت اتكلمت فى الموضوع ده قلت ان الموضوع ده لازم يتعمل عليه حملة كبيرة قوى زى الحملات اللى ضد التدخين
ولازم نفكر فى طريقة تقضى ع الموضوع ده ممكن مثلا اننا نعمل موقع نبلغ فيه عن المرتشين باسمائهم وصورهم ونحكى الحكاية ونحاول نعمل دعاية للموقع ده عشان كله يخاف انه تتنشر صورتة وحكاية الرشوة اللى هو خدها وعيالة وعيلته يشوفوها